જાગને જાદવા, કૃષ્ણ ગોવાળિયા

હે ..જાગને જાદવા
જાગને જાદવા, કૃષ્ણ ગોવાળિયા
તુજ વિના ધેનમાં કોણ જાશે ?

ત્રણસેં ને સાઠ ગોવાળયા ટોળે મળ્યા
વડો રે ગોવાળિયો કોણ થાશે ? …હે જાગને..

દહીંતણા દહીંથરા ઘી તણાં ઘેબરાં
કઢિયેલ દૂધ તે કોણ પીશે ?…હે જાગને …

હરિ તાર્યો હાથિયો, કાળી નાગ નાથિયો
ભૂમિનો ભાર તે કોણ વહેશે ? …હે જાગને..

જમુનાને તીરે ગૌધણ ચરાવતાં
મધુરીશી મોરલી કોણ વહાશે ?… હે જાગને …

 ભણે નરસૈંયો તારા ગુણ ગાઇ રીઝિયે
બૂડતાં બાંહેડી કોણ સહાશે ? …  હે જાગને …

હે ..જાગને જાદવા
જાગને જાદવા, કૃષ્ણ ગોવાળિયા
તુજ વિના ધેનમાં કોણ જાશે..??